و تتعدل

ولسه برضه بتسألى

أنا مين فـ وسط القوم

أنا الراكب في قطر الشوم

أنا الصاحي فـ عز النوم

و باخد رزقى بالتيلة

دا أنا الحيلة

و مش عاجبك

دا أنا الباقى على عهدك

و كان نفسي أكون ساعد

دا أنا إللى رضيت أكون عبدك

و من ساعدك

أكون رسام

و أرسملك

حاجات فـ حاجات

ماليش فيها

أنا ضي عيني شموع زينه

مطفيها

و جوه صدري بلاد

بخاف أخطيها

لينداس الأمل فيها

و بتعاندي

و بتقولى الحياة وردي

دا أنا ببني و إنت بتهدي

دا انا محافظ على وردي

و يبقى مضيعة جهدي

و أتغفل

و أقول أزمات

وبتعدي

و آل بيقوللى تتعدل

يا سيدي يوم ما تتعدل

إبقى إكتب على قبري

دا عاش مجنون

و مات أهبل

وتتعدل

بالأمس

بالأمس

كنا سويًا

نرسم قصتها

كانت تحدونى نظرتها

تحييني

تجعلني مركز حركتها

فوق شفاهي

رسمت بسمتها

بالأمس

كنا نمضي

نتخيل

كل الأفضل

و الأجمل

أتمنى

لو كنت الأول

ساعتها ما كنت

سأفقد قصتنا

ما كنت سأفقدها

ساعتها

ما كنت سأحيا

..

..

..

..

بالأمس

سايب دقنك ليه ؟؟

أيام كتير بيبقى عاجبك إنك سايب دقنك و مريح نفسك من الموس بس الإزعاج الكبير جدًا بيبقى ناتج من تساؤلات كتير جدًا مالهاش لازمه
كل واحد بيشوفك سواء كان صاحبك و لا زميلك ولا رئيسك في الشغل حتى بني آدم أول مرة تشوفه في حياتك تلاقيه بيوجهلك السؤال الأبدي : " إيه يا عم .. سايب دقنك كده ليه " علشان كده قولت أقولكم مجموعة من الإجابات إللى ممكن تساعدكم في الإجابة على السؤال العصيب ده
· " يعني الحمد لله ربنا هداني " : إجابة جميلة جدًا بس السؤال الأهم ربنا هداك في كل حاجه و لا في دقنك بس و بعدين المشكلة إن كل الناس هاتبدأ تقولك يا شيخ و إنت أصلاً متعرفش حاجه و لا ليك في المشيخة علشان كده الإجابة دي مش مستحبه
· " ممعاييش تمن الموس " : إجابة ممكن تكون بتقولها بهزار بس ممكن إللى قدامك ياخدها بجد أو يستخف دمه أو يستسخف و يمد إيده في جيبه و يطلعلك تمن الموس مع إن إنت ممكن تكون صارف قدامه فلوس قد كده على حاجات مالهاش لازمه
· " معنديش وقت أحلق دقني " : يا راجل و كل الوقت إللى إنت بتقعده على النت أو بتتفرج على التليفزيون ده إيه .. مش قادر تلاقى عشر دقايق من وقتك تحلق دقنك .. إجابة غير منطقية بالمرة
· " معلش أصلى مخنوق اليومين دول حبتين " : يعني مكتئب و طبيعي السبب سهل إنه يتعرف .. حبيبتك سابتك او إترفدت من الشغل أو متخانق مع أهلك .. بس مش معنى كده إنك تطول دقنك يعني لو حبيبتك سابتك هاتعملها إيه يعني في داهيه و متقلقش هاييجي غيرها و لو إترفدت من شغلك و ماله الرزق على ربنا و لو متخانق معاهم في البيت سهله قوي .. أصل إنت لو بنى آدم وحش يبقى هاتأزم نفسك ليه أصلاً هيا ديتها تروًّح البيت بدري و تقعد معاهم و تبوس إيد بابا و ماما – على فكرة مش عيب – و تتفاهم معاهم و صدقني هاتتظبت
· " معنديش مزاج أحلق دقني " : تخيل إن الإجابة دي هيا أقرب إجابة للحقيقة و مع ذلك نادر لما حد بيصدقها يا أخى الناس دي عجيبة .. مفيش حاجه تخش دماغهم غير المصايب
· و أليكم الإجابة النموذجية بس المسألة تعتمدعلى إنت هاتقولها إزاي يعني المؤدب تقولهاله بهزار و السخيف تقولهاله بسخافة أكبرو الإجابة هيا
( و إنت مالك )

أول تقرير إخباري ليا (24 ساعة على القهوة )

بحبها قوي

" بحبها قوي "
أكتر وقت ممكن تقف فيه قدام المرايه و إنت بتحلق دقنك .. في العادة ببص المراية كل يوم الصبح لمده نص دقيقة و أنا بسرح شعري و بمجرد مايبقى شبه المتسرحين أنزل على طول .. علشان كده و انا بحلق دقني بيبقى قدامي أكتر من ربع ساعة علشان أفتكر شكلي في المرايه بس الأخطر إنها في العادة بتبقى أطول فرصة إنى أقف قدام نفسي و أصارحها
" بحبها قوي"
رغم إنها غريبة .. رغم إنها يمكن متكونش بتحبني .. أو حتى مستلطفاني .. بس هى موجوده في حياتي غصب عني و غصب عنها .. هيا وحيده و أنا حيد .. هيا غريبه و أنا غريب
" بحبها قوي "
و إنت بتحلق دقنك لازم تكون دقيق .. و كمان مركز قوي و إنت بتتعامل معاها .. لإن دقنك يعني وشك و وشك يعني أول حاجه بيشوفها الناس و إي إصابه بالتأكيد هاتضايقك
" بحبها قوي "
أحيانًا بحس إنها مرتبطة بيا إرتباط حقيقي .. مش ممكن تسيبني مهما حصل بينا و أنا كمان بحس إني مقدرش أستغنى عنها .. رغم إني الحقيقة مش طبيعي ده يكون ما بينا
" بحبها قوي "
و إنت بتحلق دقنك بتحس دايمًا إنك بتقطع حته منك .. حاجه منبعها الأساسي إنت و مش حد تاني .. مهما كان شكلها ممكن يزعجك او يإلمك .. لكن دايمًا فيه ظرف ممكن تخليك تستغنى عنها
" بحبها قوي "
أحيانا بضطر أستغني عنها .. بحاول .. بس دايمًا مبقدرش أستغنى عنها كتير .. بحس دايمًا إني محتاجها و بحس كمان إنها محتاجه لوجودها في حياتي .. حتى لما بحس إنها كارهاني .. بحس دايمًا إنها كمان مبتقدرش يسيغني عنى كتير هيا كمان
" بحبها قوي "
و إنت بتحلق دقنك لازم تاخد بالك من أماكن معينه بيكون في العادة الوصول ليها صعب و بتبقى دايمًا مكان مستديم للجروح علشان كده لازم تكون هادي جدًا ومركز بزيادة عن بقية الأماكن التانيه السهلة في دقنك
" بحبها قوي "
أحيانً بضطر إني أتجنبها .. أبعد عنها .. دا بيكون لمصلحتى ولمصلحتها .. يمكن علشان منفقدش بعض و منبعدش عن بعض علشان كده دايمًا لازم نحافظ ولو على أبسط وسيلة من الإتصال بيا
" بحبها قوي "
الأماكن إللى بتحب تسيبها في دقنك زي السوالف و الشبن و الدوجلاس أو حتى لو حبيت تحدد دقنك بيخليك تبص لنفسك أكتر في المرايه و تصارح نفسك أكتر بحقيقة إللى جواك .. و لإنك قدام نفسك .. لازم تستغل ده في إنك تقول لنفسك الحقيقة من غير تزييف
" بحبها قوي "
و معتقدش إن فيه شاب ممكن يحبها غيري .. أو حتى يقبلها في حياته زيي .. دا حتى بعضهم بيكرهها و مبطقهاش و لو ظهرت في حياته بيعمل كل إللى يقدر عليه علشان يتخلص منها .
ماهو صعب جدا إن فيه شاب غيري يحب شعره بيضه طلعاله في شنبه

موس حلاقة

يوم حلاقة الدقن بالنسبالى يوم عصيب .. أنا أصلا مش من هواة حلاقة الدقن .. و كمان مش من هواة تربيتها .. علشان كده بحلقها حسب الظروف .. يعني مرة كل إسبوعين أو ثلاث أسابيع
رغم إن حلاقة الدقن من المميزات الأصيلة في عالم الرجالة .. إلا إنها بيني و بينكم عادة خطيرة جدًا .. يمكن حتى أخطر من التدخين أو معاكسة البنات في الشارع ( خصوصًا التانية لإنها ممكن تدبسك تدبيسة سودا طول عمرك ) المهم .. خطورة الحلاقة ببساطة تكمن في إنك بتحط سلاح حاد جدًا على وشك و رقابتك و إنت مش متخيل السلاح ده ممكن يعمل ايه ؟ .. خصوصًا بقى لو كان ملوث .. ملحوظة أحيانًا لما الموس بيكون ملوث بيبقى أرحم كتير من جوازة من إياهم .. القصد و رغم كل
ده مش ممكن الراجل يقدر يستغنى عن موس الحلاقة
الغريب إن الرجالة بدأوا يحطوا نظريات لإثبات تفوقهم النوعى من خلال الموس .. واحد منهم مرة قاللى : يا ول – ول دي دلع وائل بين إصحابي الأنتيخ – يا ول البنتن عامله زي موس الحلاقة .. البنت أول ما تعرفها بتنقى حادة جدًا زيموس الحلاقة في أول مرة .. لازم الراجل يكون متدرب كويس علشان ميتعورش .. المهم إن هيا كمان لازم تكزن متدربة كويس علشان متلمش لإن الموس لما بيتلم بيترمي أو على الأقل بيكون ليه إستخدامات تانية
بعد كل المده إللى فاتت دي .. إتدربت كويس إزاي أتعامل مع الموس .. لكن الحقيقة معرفتش أتدرب مع البنات